Sioe Gymraeg ar lwyfan Llundain

Mae actor ifanc yn paratoi i lwyfannu sioe un dyn Gymraeg yn Llundain, a hynny er nad yw ef ei hun yn gwbwl rhugl yn yr iaith. Gobaith Gavin Skerritt yw y bydd Cymry Cymraeg, y di-Gymraeg a dysgwyr yn mwynhau’r cyfuniad o symudiad, pypedwaith, barddoniaeth a cherddoriaeth sy’n sail i sioe Y Weledigaeth sydd I’w gweld yn Theatr Finborough o nos Fawrth nesa’ tan nos Sadwrn.

Dyw’r actor 32 oed erioed wedi byw yng Nghymru, ond mae ganddo gysylltiadau ag Ystrad Mynach lle bu’n treulio gwyliau ei blentyndod. Ond wrth addasu un o hen straeon tylwydd teg Chwedl Llyn y Fan Fach ar gyfer y llwyfan, fe benderfynodd yn syth mai dim ond yn y Gymraeg oedd modd ei pherfformio.

“Mae fy mam yn Gymraes, ond dwi erioed wedi byw yng Nghymru,” meddai Gavin Skerritt , sydd wedi bod ar gyrsiau Cymraeg yn Aberystwyth a’r Fenni. “Fyddai’r stori ddim wedi gweithio cystal yn Saesneg.” Arbrofi gyda’r defnydd o iaith yw diddordeb Gavin Skerritt . Iddo ef, mae swn a rhythm geiriau cyn bwysiced â’r ystyr. Dyna pam ei fod e’n hyderus y bydd aelodau di-Gymraeg gynulleidfa yn mwynhau gwrando ar Y Weledigaeth, ac yn deall be’ sy’n digwydd o’r elfennau gweledol. “Dw i’n gwbod mod i’n disgwyl lot o’r gynulleidfa, ond be’ dw i’n gofyn yw iddyn nhw neilltuo unrhyw amheuon ynghlych dilyn y naratif a jyst gwrando.

“Yn y bon, mae ganddoch chi ddau berfformiad mewn un ac mi fydd y profiad I’r di-Gymraeg yn hollol wahanol i brofiad y rhai sydd yn deall y testun. “Fe fydd y di-Gymraeg yn gorfod defnyddio mwy o’u holl synhwyrau.”

Mae gan Gavin Skerritt gymaint o ffydd yn ei greadigaeth nes ei fod e wedi talu am y cyfan o’i boced ei hun. “Liciwn i lwyfannu’r Mabinogion fel hyn rhyw dro,” meddai, “Ond fe fyddai hynny falle yn rhy uchelgeisiol ar hyn o bryd.”

Gan Golwg.